الزواج
هذه المقالة ليست من تجارب شخصية, أنا أعرض مشكلة لا أكثر ولا أقل.
من فترة طويلة ما كتبت و طلعت كتاباتي على مدونتي. والله إني إشتقت للتدوين يا جماعة :)
هذاك اليوم شفت إحصائية أردنية بتقلك إنو نسبة العنوسة بين البنات في الأردن هي 56%! يعني أكثر من نص بنات الأردن اللي فوق سن معين مش متجوزين و الموضوع مش عشان البنات بدهمش. و التقرير نفسو بيحكي إنو نسبة الشباب الذكور المش متجوزين هي 57%.
أنا مش حاقد على حدا والله العظيم, و ولا حتى إني كاره لأي إشي, هاي المقالة مسالمة أكثر إشي في العالم, بس حبيت جد أفكر بصوت عالي و أشارك برأيي.
قبل فترة سمعت بنت بتحكي لبنت إنو فش حد متقدملها و إنها حلوة و إنها متذايقة. فالموضوع شدني إني أرخي ذاني! المهم, صاحبيتها قالتلها والله الشباب مقرفين و إنهم طول الوقت بطقسو عليها و بس فش حد بيجي جدي و إنها البنت ما عندها مشكلة كيف ما كان ظرف الشب, فهديك البنت فاعت فيها و بدت تحكيلها كيف يعني كيف ما كان ظروفو!؟ حبيبتي أصلاً أنا لو ما كان مهري 3000 دينار ما بتجوز, بنات الناس مش رخاص…
والله بيني و بينكم, شكلها البنت رح تضل فبيت أهلها….
فرصة إنو الشب اللي بدو يدفع متوسط مبلغ (25000 دينار أردني) عشان يتجوز بنت متعلمة و حلوة إنقرض؟ لأ و اللي بيقهر إنو في ناس بيطلبو أشياء؟ يا زلمة ليش العجرفة؟ حلو البنت يكون عندها مهر, والله إني مش حقود ولا بخيل, بس يا زلمة والله مش مقياس! لو بدنا نقيس على نفس القياس رح أحكيلك بنتك أو أختك مش أحسن من بنت النبي عليه السلام اللي جوزها لسيدنا علي بمهر قدرو (لا إله إلا الله)!
طب شو فرق إنو الشب ياخذ فلوس من أبوه يتجوز على الشب اللي أبوه مش غني؟ تفو عليه؟ ما يتجوز؟
بأمريكا البنات ما بيصدقو على الله إنو شب يتقدملهم! وبناتهم (بلا مؤاخذة) أحلى من بناتنا! الفرق إنو إحنا عنا دين, بس المجتمع اللي فيه دين لازم يكون هيك؟
طيب خلينا نحكي بالمنطق… ما بدنا شبابنا و بناتنا يصاحبو… طب ليش المجتمع (واللي كلنا جزء منو) بيصعب الزيجة لهل المرحلة؟ و ليش الشب فينا يضل عازل حالو لآخر العشرين أو أول الثلاثين ليشعر بالحب أو أي شعور إنساني طبيعي إتجاه أي بنت؟
حكيت بالموضوع مع أحد أصدقائي المقربين, قالي: يا زلمة اللي بدو يتجوز بيتجوز! ياما في بنات بس بدهم السترة! و أهليهم ما بيتطلبو و من إيدك اليمين لأيدك الشمال… أنا بعرف هالحكي, بس هدول البنات ما بيكونو حلوين أو مش متعلمين (كلمة التعليم مش عيبة, و المش متعلمة مش معناها غبية بس البنت المثقفة و المتعلمة ممكن تساعد بكل مناحي الحياة, ما بدي أحكي بس بشكل مادي, بس حتى بتربية أبنائك أو حتى بمعاملتك كشخص بطريقة أرقى) هيك علمونا.
كلنا حبينا و تكسرت قلوبنا و كان السبب يعود لنفس الظرفين ثلاثة فش غيرهم -طبعاً أنا هون بحكي بشكل عام- واحد إنو الشب و البنت عرفو إنهم مش لبعض, أو إنهم وصلو لمرحلة خافو إنو اللي بيعملو (إنهم بحبو بعض, لأي مرحلة من المراحل في علاقتهم) غلط و إنهم بدهم يخافو الله أو شعور الخوف من الأهل أو السبب الأكبر هو إنو الشب بيكون يحب البنت و فجأة بتحيكلو إجاني عريس (جاهز)… أو إنت مش (جاهز).. أو يكون بحبها و بحكيلها إنو أنا مش جاهز و بعرف إني على المقاييس الحاليية مستحيل (أجهز) لثلاث أربع سنين, وليش أخليها تستنى, من قد حبي إلها أنا لازم أبعد عنها…! يا إنو الشب بيحس حالو (ناقص أو ضعيف) أو إنو البنت تحس حالها (خاينة لأهلها و كذابة).
و هالحكي طبيعي! عشان أهلينا علمونا إنو الزلمة الإشي الوحيد اللي بيعيبو هيه جيبتو.. إنو (إذا دخل الفقر من الشباك هرب الحب من الباب) و علمونا إنو مفروض البنت تكون برنسيسة و بتضل في بيت زوجها معززة مكرمة تصونو و زوجها بيصرف عليها و على البيت.. و علمونا إنو الزلمة فينا اللي بيصاحب بنات الناس مش محترم (عشانو بيضحك على بنات الناس), و علمونا إنو الحب حرام.. و علمونا إنو البنت اللي بتتفرج عليك بتتفرج على 100 غيرك… و ممكن كل هالكلام صحيح..
علمونا إنو الشب اللي بياخذ بنت أكبر منو (بتهرم قبلو), علمونا إنو البنت الفلاحة بتختلف عن البنت المدنية و بيختلفو عن البنت البدوية… علمونا إنو بنات المسحية بيختلفو عن بناتنا المسلمات, علمو بنات المسيحية إنو إحنا الشباب المسلمين بنختلف عن شبابهم.
علمونا إنو البنت بنوت أحسن من المطلقة (الثيب), علمونا إنو البنت اللي محجبة غير المفرعة, و علمونا إنو البنت المتحجبة محترمة (طبعاً بغض النظر إذا أهلها غصبوها عليه, مهيه بالآخر رح تتعود عليه). علمونا إنو الشب بس يتقدم لبنت و يكون أكبر منها بعشر سنين بيكون كبير كثير عليها.. و علمونا إنو البنات همه الجناح المكسور الضعيف… علمونا إنو البنت اللي (بتوقف الشب عند حدو) بنت قوية, فشفنا في الجامعات البنت اللي بنطلب منها دفترها لشب يصورو و تكسفو قدام خلق الله عأساس إنها محترمة و إنو بيستاهل عشان ما ياخذ عين. علمونا إنو البنت اللي بتدخن مش كويسة, و علمونا إنو الحب بيجي بعد الزواج, و كل الحكي اللي قبل الزواج حكي فاضي… علمونا إنو البنت اللي بيكون عندها شباب أصدقاء شباب مش محترمة, علمونا إنو الشب اللي بيعرف بنات نسونجي.
أنا برأيي المتواضع لا أدعم فكرة إعطاء البنت مهر (قال سيدنا محمد عليه السلام: أقلكن مهراً أكثركن بركة), أو أن تكون كل تكاليف الزواج و تبعاته و الحياة كاملة و تبعاتها على الشاب. لأنني وقتها أشعر و لو بشكل خفيف أن البنت في هذا الحال تتحول لسلعة يقتنيها الشاب (ليكمل بها حياته). إستنو شوي, إرجعو شوي للدين و إفهمو ليش دين الإسلام حط فكرة المهر يا جماعة!!!! الفكرة مش عشان يصعب الأمور و يرفع عمر الزواج للثلاثين!
صدقوني الموضوع مش شخصي, يمكن بس آجي أتجوز أدفع أكبر مهر لأحلى بنت بالعالم, ما بعرف مين رح تكون, وين, أو بأي بلد.. بس أنا ما رح أعلم ولادي كل هالحكي.. يمكن أنا غلط. بس انا بعرف إنو هيك مش صح. للأسف إنو مجتمعنا ظالم للشباب و البنات و بيعلم النفاق و الكذب و إزدواجية المعايير.
بتمنى تشاركو بآرائكم بكل حرية.
I think, and truley believe that it is wrong to throw all marraige expenses and preperations on the Groom’s shoulders. And Against paying a big amount of money as a girl’s dowery because i personally think it is downplaying and offensive to my humanity to be priced even though our parents teach us that it’s not about a price, but no matter how you flip it it is like that.I can feel appriciated and live with dignity through other matters instead of money. I refuse to be price tagged or to be fully depending on my husband because at the end he is human with limits..I am a true belliever of the two genders working together side by side to secure a good living for themselves and for their children.
There are so many points in this article im gonna have to read again to recall lols
Rocean,
All I can tell you is “الله يكثر من أمثالك” hahaha :))
Allah y6awwel b 3omrak. lool